Molfsee (t). Op de 30. Nedderdüütschen Theaterdaag in’t Freilichtmuseum Molfsee hett Johannes Callsen, de Minderheitenbeopdragte vun’t Land Sleswig-Holsteen, den Konrad-Hansen-Preis 2023 an de beiden Gewinner övergeven.
De Pries warrd siet 2014 vun‘ Nedderdüütschen Bühnenbund Sleswig-Holsteen e.V. to Ehren vun Konrad Hansen vergeven. De Schrieversmann, Regisseur, Bühnenautor und Intendant is mit sien mehr as dörtig Theaterstücke en Garant för modernes, qualitativ hochwertiges Theater west. 2012 is de groot Theatermann storven un is nu Naamsgever för den plattdüütschen Autorenwettbewarb. „Siet dörtig Johr sünd de Nedderdüütschen Theaterdaag en schöne Tradition un en richtig gode Visitenkort för dat plattdüütsche Theaterspeel“, so Callsen. „De Vergröttern vun den Fundus an nedderdüütsche Theatertexte ok mit aktuelle un zeitkritische Themen is en Gelegenheit, düsse Spraak wieter to bringen un Stücke för de Speeldeelen to entwickeln.“ Dat geev man blots tein Stücke to Utwahl, man dat weern „echte Perlen“, meen Birgit Bockmann, Laudatorin un Vörsittersche vun’e Jury.
Zeitkritisch un aktuell is ok dat Stück, womit Arne Christophersen den 1. Pries wunnen hett: „An de Kant“ heet dat. „Drei Bühnenbilder, drei Zeitebenen, Darsteller, die 60 Jahre Leben abzulichten haben und das alles parallel“, dat is mehr as „ambitioniert“, so Birgit Bockmann. Liekers is dat wunnerbar glückt. De Geschicht dreiht sik üm Nicky, en Deern, de all as Baby in’t Kinnerheim kamen is un nu in’t Lanneskrankenhuus Sleswig insparrt is. Nicky is en Genie – un dat warrd ehr to’n Verhängnis. Denn en Dokter erkennt ehr Potential un will mit sien wetenschapli Studien an ehr berühmt warrn. „Ich will nicht verurteilen, ich will auch nicht beurteilen, aber Sie merken schon, dieses Stück hat mich persönlich unglaublich berührt und vielleicht auch wachgerüttelt, aufzupassen, wenn so etwas passiert“, so de Jurorin. „Ein Leben an der Kante, ein Leben am Limit“, so is ok de Titel „An de Kant“ tostann kamen.
Arne Christophersen hett all in’e Schooltiet Theater speelt un as jungen Keerl sien egen Theatergrupp in Flensborg op de Been stellt. 25 weer de Plattsnacker bi de Nedderdüütsche Bühne in Flensborg as Schauspeler un Regieassistent mit dorbi. Stücke schrieven un översetten deit he all lang un för veele verscheden Bühnen.
De tweete Pries nimmt uns mit in’t „Paradies“. So heet dat Stück vun Christin Kolbeck. In dat Drama draapt sik fief ganz ünnerschedlich Minschen in en Art Töövruum. Se sünd dor inslaten – un dat all lang. Jichtenswenn markt de Toschauer: Alle Personen sünd all doot un alle hebbt se wat Slimmes in ehr Leven doon. „Wie raffiniert die Autorin ihre Figuren führt, mit wieviel Witz und Esprit neben aller Angst und Hoffnungslosigkeit, Stillstand und Starre sie die Figuren agieren lässt, mit was für einer Leichtigkeit sie sich der ganz großen Themen annimmt: Kriegsverbrechen, Sterbehilfe, Mobbing... das ist wirklich einmalig und außerordentlich begabt“, so Birgit Bockmann in ehr Loffreed.
Christin Kolbeck is in Flensborg opwussen un weer fröh Füer un Flamm för de Spraak, Literatur un Theater. Siet 2010 höört se to dat Ensemble vun’e Nedderdüütsche Bühne in Flensborg un weer all bi veele Stücke mit dorbi. Nu hett se ehr eerst egen Theaterstück schreven. Dat geiht ehr üm Ethik un Moral, „zwei Themen, die brandaktueller nicht sein könnten“, so de Schrieversfru.
In‘ Ansluss an de Verleihung vun den Konrad-Hansen-Pries hett de Nedderdüütsche Bühne Flensborg dat Stück „Dörtig – endlich vulljährig!“ speelt. De Komödie vun Sofie Köhler hett 2021 den Konrad-Hansen-Pries wunnen un is all an veele verscheden Bühnen opführt wurrn. En Teken dorför, wo wichtig niege, moderne Stücke för de plattdüütsche Theaterwelt sünd. Denn dat Nedderdüütsche Theater is siet 2014 en Deel in’t „bundesweite Verzeichnis des immateriellen Kulturerbes der UNESCO“. De Nedderdüütsche Bühnenbund Sleswig-Holsteen e.V. will nich blots dat Nedderdüütsche Theater fördern, sünnern ok de ganze Bandbreede vun plattdüütsche Stücke lebennig holln un dorför sorgen, dat jümmers wedder niege, moderne Stücke dorto kaamt.
Wi dankt den Gewinnsparverein der Volksbanken und Raiffeisenbanken Norddeutschland e.V. för Stütt un Stöhn.