Moin! Mien Naam is Heinrich Evers. Ik wahn in de Europastadt Niestadt in Holsteen un bün de Plattdüütschbeopdragte vun den Kreis Ostholsteen. Vundaag heff ik ‘n bannig goden Henwies för’n dulle Veranstalten an’t Wekenenn. Doch - erstann vertell ik ju wat över dat Weder.
 
An’n Friedag kiekt - mit’n beten Dusel - männichmal ok sogoor de Sünn mang de dichten Wulken hendörch. Wi künnt mit Temperatur’n vun söven bit teihn Graad reken. Man - vergeet de Schirms beter nich, denn so’n beten Smuddelregen kunn dat - af un an - jümmers mal weller geven. De Wind weiht dorbi middelstark ut Süüd bit Süüdwest. An de Küst kunn dat ok mal lütt beten wat mehr püstern.
 
To‘n Glück warrt dat an’n Sünnavend beten wat beter. Dat blifft ollig wat länger dröög un - blots af un to - kunn mal de een or anner Regendroppen daalkamen. De Temperaturen liggt sogoor bi negen bit dörteihn Graad un dorto gifft dat blots wenig Wind.
 
Sünndag gifft dat weller mehr Regen. De Sünn warrt sik achter dichte Wulken vertrecken un dat warrt wenig kommodig. Dorto gifft dat Temperaturen vun söss bit negen Graad un lütt beten Wind ut Süüd bit Süüdwest.
 
Henwies: Wokeen dat gode Weder an’n tokamen Sünnavend nütten will, de sull sik doch avends Klock halvig söven eenfach op’n Weg in de Lübecker Bucht na Pelzerhaken, den Ortsdeel vun Niestadt in Holsteen, maken. Dor hebbt wie en Wannern an’n Strand mit brennen Fackeln in de Hannen för ju vörbereidt. Wi draapt uns an’n Seebrückenvörplatz vun Pelzerhaken un erkundt denn in’n Fackelschien de kommodige Strandbucht. Bi hitte Drinks un Snacks op Hooch un Platt köönt ji na dat Wannern op de Winterterass vun Pelzerhaken weller so richtig opdauen.
Heinrich Evers